Гәрәева Венераның шәхси сайты

Әниләр бәйрәме

doshkolnik — Fri, 02 Dec 2016 19:20:07 GMT

Көзнең соңгы ае ноябрь безгә әниләр бәйрәмен алып килә. Бала өчен әнидән дә кадерле, әнидән дә якын кем бар икән? Йөрәктә әниләргә карата булган ихлас хисләрне, күңелдә йөрткән җылы сүзләрне шушы бәйрәм иртәсендә җиткерәсе килә.

Елдагыча, безнең балалар бакчасының һәр төркемендә әниләр бәйрәме үткәрелде. Балалар әниләренә әйтәсе теләкләрен шигырь юллары белән, җыр-биюләр аша җиткерделәр, газиз әниләрен сәхнәләштерелгән музыкаль әкиятләрдә катнашып сөендерделәр.

Бәйрәмнең бизәге — әниләрнең алтын куллары ярдәмендә ташландык материаллардан ясалган күлмәкләр, аксессуарлар булды. Берсеннән-берсе матур, күңел биреп эшләнгән кул эшләре барыбызны да таң калдырды. Газета, целлофан пакет, сетка капчык, конфет кәгазе һәм башка бик күп ташландык материаллардан тегелгән күлмәкләрне киеп, нәни кызларыбыз әниләренең осталыкларын күрсәттеләр.

Яңа ел белән!

doshkolnik — Tue, 31 Dec 2013 19:52:34 GMT

Хөрмәтле коллегалар, дуслар!

Сезнең барыгызны да чын күңелемнән Яңа ел - зәңгәр Ат елы белән тәбрик итәм! Ат - ул бик чыдам, эшчән, тырыш, тугры хайван. Сезгә яңа елда ныклы саулык-сәламәтлек, ак бәхетләр, сабырлык, тырышлык, җитезлек теләп калам. Гаиләләрегез имин булсын, парсызлар насыйп ярларын тапсын, парлылар үз парларына тугры калсын. Барыгызга да бәрәкәтле, мул тормыш теләп калам. Кайгы-хәсрәтләр сезне урап узсын, ишекләрегезне бәхет-шатлык кына шакысын. Өлкәннәргә балаларының игелеген күреп, кадер-хөрмәттә яшәүләр насыйп булсын. Эшләрегез гел уң булсын, хезмәтегездә югары үрләр яуларга насыйп булсын.
Яңа ел белән, яңа бәхетләр белән сезне, дуслар!

Корбан гаете белән!

doshkolnik — Tue, 15 Oct 2013 19:51:47 GMT

Мөселманнарның иң зур һәм мөбарәк бәйрәмнәренең берсе – Корбан гаете. Барлык мөселманнарны: Татарстанда, Башкортстанда яшәүчеләрен дә, башка төбәкләрдә яшәүчеләрен дә изге Корбан гаете белән котлыйм!

Корбан гаете, Ислам динендәге башка бәйрәмнәр кебек үк, яхшы эшләр кылуны, рухи чисталыкка ирешүне, гөнаһларыбызны ярлыкауны чагылдыра. Әлеге бәйрәм бигрәк тә авыруларга, бәла-казаларга юлыккан мөселман кардәшләребезгә, олы буын вәкилләренә, ятимнәр һәм мохтаҗларга битараф калмаска, аларга игътибар һәм ихтирам күрсәтергә чакыра. Тормышта, матди байлыктан бигрәк, якыннарыңның, туганнарыңның игътибары һәм җылы мөгамәләсе күпкә кыйммәтрәк булуын искәртә. Бу бөек бәйрәмнең эчтәлеге нәкъ менә кешеләр мәнфәгатен кайгырту, аларны ярату һәм ярдәм кулы сузуга нигезләнгән.

Изге Корбан бәйрәме көнендә кылган догаларыбыз кабул булсын, изге ниятләребез һәм якты хыялларыбыз тормышка ашсын. Йортларыбызга бәрәкәт, күңелләребезгә – иман нуры, гаиләләребезгә иминлек, тынычлык һәм мәхәббәт хисләре иңсен. Бу мөбарәк көннәрдә тәкәбберлекне ташлап, ата-анага, туганнарга һәм бөтен җан ияләренә ихтирамлы булып, бәхиллекләрен сорап, хәер-догаларын алырга тырышырга кирәк. Барыбыз да изгелек эшләргә ашыгыйк!

Корбан бәйрәме мөбарәк булсын!

Яңа ел белән, дуслар!

doshkolnik — Mon, 31 Dec 2012 19:24:42 GMT

ЯҢА ЕЛ БЕЛӘН, ДУСЛАР!

Тагын бер ел гомер үтеп китте, кемнәрдер бу елда үзенең тиң ярын тапты, кемнәрдер гаилә корды, кемнәрнеңдер нәниләре туды, кемнәрдер яңа йортлы булды, кемнәрдер эшендә зур уңышка иреште. Кемнәрнеңдер ишеген Кайгы шакыды... Бусагада 2013 нче ел - Елан елы тора. Яңа елда берәүгә дә Кайгы килмәсен, бәхет-шатлык белән генә гомер кичерергә язсын иде. Һәркемгә тазалык-саулык, гаиләләренә иминлек, тынычлык, эшләрендә уңышлар теләп калам. Яңа ел белән, яңа бәхетләр белән сезне, дуслар!

Еллык нәтиҗә

doshkolnik — Fri, 19 Oct 2012 19:04:35 GMT

12 нче сентябрь көнне Балтач мәдәният сараенда "Укытучылар көне"нә багышланган тантаналы чара булып узды. Биредә ел дәвамында аеруча нәтиҗәле эш күрсәткән укытучыларны һәм тәрбиячеләрне бүләкләп үттеләр. Безнең балалар бакчасының физик культура тәрбиячесе Федорова Светлана Александровна "Ел тәрбиячесе-2012" конкурсында катнашып, "Балаларда сәламәт яшәү рәвешенә мәхәббәт тәрбияләү" номинациясендә муниципаль этапта җиңеп чыкты. Аңа бу тантанада Балтач район мәгариф идарәсенең Мактау грамотасы һәм бүләк тапшырылды.
13 нче октябрь көнне Балтач районы балалар бакчаларының II спорт фестивалендә Федорова Светлана җитәкчелегендәге "Карлыгачлар" командасы БЕРЕНЧЕ урын алды! Бакчабыз командасына Балтач районы яшьләр һәм спорт бүлегенең Мактау грамотасы һәм балаларга уенчыклар алу өчен 1000 сумлык сертификат тапшырылды. Ярышта катнашкан балаларга сау-сәламәт, акыллы булып үсүләрен, ә Светлана Александровнага киләчәктә тагын да зур уңышлар теләп калабыз!

Белем көне белән!

doshkolnik — Sun, 02 Sep 2012 17:50:21 GMT

Бәйрәм белән!

Хөрмәтле укытучылар, тәрбиячеләр, барлык педагоглар! Сезне ихлас күңелемнән Белем көне белән тәбрик итәм! Барыгызга да ныклы сәламәтлек, шатлык-куанычлар, гаилә тынычлыгы, тынгысыз, авыр хезмәтегездә зур сабырлык, түземлелек, зурдан-зур уңышларга ирешүегезне теләп калам. Үзегез укыткан балаларның, аларның әти-әниләренең, тирә-юньдәгеләрнең олы хөрмәтен, ихтирамын тоеп яшәргә һәм эшләргә насыйп булсын.

"Ел тәрбиячесе-2012" конкурсы

doshkolnik — Fri, 13 Apr 2012 19:15:25 GMT

13 нче апрель көнне Карадуган балалар бакчасында "Ел тәрбиячесе-2012" конкурсы финалы булып узды. Биредә зона ярышларында җиңеп чыккан тәрбиячеләр үзара көч сынашты. Алар башта үз-үзләрен тәкъдим иттеләр, аннары балалар белән шөгыль уздырып күрсәттеләр, ахырдан педагогик ситуацияне чишү ярышы булды. Конкурста 5 тәрбияче-конкурсант, 3 тәрбияче-новатор катнашты. Быелгы конкурс шуның белән истә калыр, мөгаен: бәйгедә катнашучы тәрбияче-новаторлар күрсәткән шөгыльләр конкурсантлар күрсәткән шөгыльләрдән уңышлырак иде! Презентацияләр буенча да тәрбияче-новаторлар өстен торды. Моны район мәгариф бүлеге җитәкчесе Гөлнара Зәкәриевна да таныды. Тик конкурс узган, һәм аның нәтиҗәсе булырга тиеш. Соңгы нәтиҗәне жюри түбәндәгечә чыгарды: "Ел тәрбиячесе-2012" район конкурсының җиңүчесе дип Кариле балалар бакчасы тәрбиячесе Муллагалиева Гөлсәрия игълан ителде.

Быелгы ярышның нәтиҗәләре менә шундый. Бәйгенең уңай яки тискәре яклары булса, алар турында үз фикерләрегезне, тәкъдимнәрегезне языгыз, райондаш коллегаларым. Проблемаларны уртага салып чишкәндә аларны чишү юлларын табу ансатрак. Ә конкурста катнашкан һәр тәрбиячегә киләчәктә иҗади уңышлар теләп калам!

Балтач 3 нче балалар бакчасы тәрбиячесе Федорова Светлана Александровнаның "Ел тәрбиячесе-2012" район конкурсында тәрбияче-новатор буларак күрсәткән шөгыленнән күренешләр